經過多日嚟嘅觀察, 我地發現啲團友沿途都掛住影相(包括我), 所以我地今次出發前講定清真寺幾點閂門, 要行快啲, 唔好再影相, 行甩咗嘅自行去清真寺, 今次Jeffery帶路, 因為佢真係好少沿路影相同埋佢話佢睇完地圖識路, 佢同Jason兩個真係行得好快, 我地成班女只好跟住, 真係好快(大概十分鐘)就到咗清真寺啦.
入到去, 真係好鬼大, 我地又各散東西咁去影相啦. 當我地見到有人禱拜嘅時候, 又唔識點問佢地可唔可以影相, 咁一貫風格扮傻仔照影啦, 點知就算佢地發現咗我地影佢相, 佢地都笑笑口同我地打招呼, 我地俾番幅相佢睇, 佢地都好開心. 伊朗人真係好鬼nice. 參觀完清真寺, 我地打算去33孔橋 (Bridge of 33 Arches), 我地諗住搭的士去, 點知又搵唔到的士, 咁我地諗住行過去啦, 行行吓, 又諗吓不如搭巴士囉, 點知我地沿路係搵唔到一個識英文囉, 再問多幾個人, 又唔知喺邊度走咗一個識英文嘅人出嚟, 佢同我地講冇巴士去33孔橋, 叫我地搭的士, 之後佢走咗啦, 咁我地截咗架的士,.果個伊朗人又唔知喺邊度走出嚟幫我地同個的士司機講價, 真係好似阿拉真神咁.
去到33孔橋, 一落車, 我地已經發覺好多人望住我地, 之後仲有一班”喪妹”要求同我地影相, 佢地真係”喪”架, 影完之後好開心咁睇相, 我地真係以為我地係果啲乜嘢Super Junior 呀, CN Blue 呀, 同我地影完相可以開心成咁, 咁我地行上橋參觀啦, 發現有個靚仔, 真係好鬼靚仔, 我地特登走去叫佢同我地影相, 仲追住佢嚟影相, 攪到同行嘅男團友好鬼冇引, 冇計啦, 咁人地真係好鬼靚仔嘛. 影完相佢走嚟同我講一輛波斯話, 我鬼知佢講乜咩, 我估佢叫我俾番啲相佢啩, 咁我同佢講你俾個e-mail address我, 我e-mail俾你啦, 佢唔明我講乜. 叫咗佢個friend嚟翻譯, 佢個friend講完俾佢聽之後, 佢打咗佢個friend一巴就走啦. 我地完全唔知發生乜事, 只好以我地嘅想像力, 配音如下:
靚仔同佢個friend講: 喂, 我唔知佢講乜呀, 你英文好, 幫我翻譯吖
我: can u give me your e-mail address? I can e-mail the pictures to u 佢個friend: 佢問你攞e-mail address呀., 擺明想溝你啦.
靚仔打完佢個friend一巴再同佢講: 衰佬!你唔知我對你點嘅咩, 你咁嚟諗我, 我對你好專一架!!
你話我地係唔係好好想像力呢!?!?!
之後去咗一間4星級餐廳食飯, 真係4星級架, 個牌有4粒星同埋裝修好靚, 嘢食好味, waiter又識英文, 真係Highly recommend呀, 最緊要係我地食埋甜品先係每人HK$4x, 你話啦, 喺香港大家樂, 茶餐廳都唔得啦, 仲要真係4星級餐廳喎, 一聽到個價錢真係好想”撩”住牙講一句”抵x”, 可惜搵唔到牙簽!!
之後再去33孔橋影夜景, 沿路見到有個shopping mall, 咁我地入去睇吓, 原來係伊朗版金都, 好多婚紗, 晚裝賣, 不過我地真係唔知佢地點著呢啲衫行禮同影pre-wedding, 如果大家知嘅, 請話我聽啦.
去到33孔橋, 本來真係諗住影夜景架, 唔知邊個話落橋底行吓, 因此冇水, 可以行落去, 咁我地行落去啦. 咁就出事啦, 首先係男團友俾人兜搭, 咁我地唔理佢地啦, 我地繼續自己影相, 點知佢地又叫我地幫佢地影相, 之後又話要同我地影相, 咁我地唯有就好似Mickey mouse 同Minnie mouse咁同佢輛流影相啦, 影影吓都好地地嘅, 點知佢地又唔知做乜拗架, 好彩佢地有個好靚仔, 識英文, 戴眼鏡嘅一個讀書人同我講, “你地影埋呢幅好走啦, 我唔想你地有乜麻煩”, 之後仲護送我地離開事發現場, 我地join埋大隊就行番上條橋, 唔敢再落去橋底啦. 本來我地諗住行晒33個孔, 行去對面岸, 點知行咗1-2個孔就出事啦, 所以我地叫呢條做”33恐橋”
之後再去Khaju Bridge (哈鳩橋), 呢條橋冇33孔橋咁長, 但橋上面有好多雕刻, 所以靚好多, 而我自己亦都比較喜歡呢條橋多啲…
想睇多啲相, 可以到以下嘅FB: https://www.facebook.com/media/set/?set=a.10152263906505647.934744.860415646&type=1&l=d863ec7bef
沒有留言:
張貼留言