今朝喺酒店食早餐, 一入到間餐廳真係幾靚喎, 好似間教堂咁. 食完早餐, 我地同埋尋日識果個當地女人一齊出去玩, 佢幫我地叫埋車. 嘩!!果架車廿座位, 包一日每人都係四十幾蚊, 真係”抵x”呀, 咁我地話俾佢聽我地想去邊, 我地首先去咗個Abyaneh古村, 其實果個村已經唔多人住, 都係果啲老人家住啦, 不過佢地果啲頭巾都幾有特色, 唔似出面果啲黑麻麻咁. 其實呢個古村有好多泥屋果啲, 影起相嚟都幾特別架.
之後我地諗住去Fin Garden, 點知去到已經閂咗啦, 咁算啦, 去咗一個唔知乜名嘅清真寺, 又玩咗一輛, 又影咗一輛相, 要返去酒店開我地個”中秋節晚會”啦.
一上車, 唔見咗個當地女人, 原來佢坐咗喺我地亞公隔離, 想我地俾錢佢, 講真, 見佢陪咗我地玩成日, 都諗住俾錢佢架啦, 點知佢要求我地俾二百萬佢, 正所謂一千幾百猶如垃圾, 一萬幾千過眼雲煙, 我覺得ok價, 仲叫亞公照俾佢, 好彩亞公即刻計到條數係五百幾蚊港紙, 嘩!!!仲貴過我地包車, 唔值喎, 後來經亞公計數後, 決定同佢講價, 最終喺佢不情願下以一百萬成交. 講真, 我地初頭以為因為佢地好熱情咁同我地一齊玩, 所以冇問清楚要唔要錢, 點知最終要錢, 下次真係要問清楚呀. 本來叫佢嚟參加我地個”中秋節晚會”. 咁樣都唔叫佢嚟啦…
有啲人之後去買生果, 而我同其他人就去post office買郵票. 去到post office問寄Postcard去香港幾錢啦, 佢check完一輛 (都幾個字), 佢話一萬Riels, 不過冇10000Riels郵票, 叫我地貼4張2000Riels郵票就ok, 但係4x 2000 = 8000喎, 咁我地同佢double confirm4個真係ok, 咁佢都話ok, 因為我要寄成30張postcard, 所以我要計一輛數, 究竟要幾多個啦, 而其他人就問佢寄其他地方幾錢啦, 原來係唔同嘅, 但係佢每check一個地方都check成幾個字, 咁我唔止寄香港架嘛, 仲有其他地方, 咁問法, 真係問成幾個鐘囉, 我決定唔理啦, 唔係香港果啲, 貼多一個stamp啦,. 咁我計好數要幾多個郵票啦. 咁有人問佢多一句, 如果要10000Riels, 咁點解4個2000可以寄到呀, 咁佢話4 x 2000= 10000囉, 朋友話係8000喎, 佢用計數機再計過, 真係10000喎, 我頂!! 小學三年班都知係10000啦, Post office manager都計錯數…..唉!!我又要再計過啦, 計好啦, 我要買230個郵票, 我都已經自己攞郵票去俾錢啦. 費時”麻煩”佢. 點知佢數到250個, 我地再數過一次俾佢睇, 原來佢數到果張郵票係10張x 10張, 但查實係9張x 10張, 我頂, 連數嘢都數錯, 如果平時, 我會覺得佢特登呃我錢, 但因為佢之前都話俾我聽4個郵票ok, 我絕對有理由相信佢係數學唔得嘅, 唉!!經過個幾小時, 終於買到郵票啦…
之後返去酒店, 食完飯, 肥仔嚟咗(尋日識嘅當地男子) join我地嘅中秋晚會, 佢好好人呀, 知我地未book下一站嘅酒店, 佢打電話幫我地book埋, 佢對於我地中秋嘅燈籠, 嘢食非常有興趣, 因為佢啲英文好好, 我叫佢幫我地請酒店啲人食月餅, 臨走我地仲送咗啲月餅/燈籠俾佢帶番屋企俾佢屋企人試吓.想睇多啲相, 可以到以下嘅FB: https://www.facebook.com/media/set/?set=a.10152253939645647.933084.860415646&type=1&l=b5a52ab993
今日又一早起身去Golestan Palace（古列斯坦皇宮）啦, 又係搭地鐵, 不過只係一個站咋. 查實尋日又皇宮, 今日又皇宮, 對於我呢個唔知伊朗歷史嘅人嚟講, 真係攪唔清楚, 不過呢個皇宮都好靚, 有好多彩色玻璃窗, 仲有佢地好興用啲玻璃塊嚟當牆紙咁貼, 真係好鬼死靚同好閃.
遊完皇宮之後, 我地返酒店攞完行李就去巴士站, 搭車去Kashan啦, 當然我地又要經過一輛雞同鴨講先買到飛啦, 一上巴士, 嘩, 啲位闊到呢, 真係闊過啲飛機位呀…我未去伊朗之前, 朋友同我講巴士啲位好似Business class咁, 我初頭都唔明, 而家明晒啦, 真係好正!! 行車中途仲有”巴士餐”食, 雖然只係幾件餅, 一個蛋糕加一包嘢飲, 但係程巴士得果幾個鐘, 都有咁好service, 仲要係港紙個十幾廿蚊, 你話呢個”package”係唔係超值先, 真係好鬼”抵x”.
到咗Kashan, 個巴士上職員問我地去邊, 我地俾咗間酒店名同波斯地址俾佢睇, 佢隔咗一陣, 就叫我地落車啦, 叫我地搭的士去, 我地知架巴士係去唔到酒店, 但都話聲俾我地聽我地喺邊好啩, 不過我明白佢根本就唔識講俾我地聽我地喺邊…哈哈!!落咗車, 我地諗住搭的士去酒店, 點知又係雞同鴨講, 搵埋警察, 佢幫我地打埋電話去酒店都溝通唔到, 好彩有一個當地女人幫我地, 我地終於可以順利搭的士同去到間酒店啦.
去到酒店, 間嘢同網上邊啲相一樣架, 好鬼死靚, 不過佢喺個e-mail已覆我地冇晒double room, 只可以安排一間4人房同5人房俾我地, 咁我地呢班人睇晒兩間房, 再決定自己住邊間, 好彩我地各自都去到自己想要住果間房, 除咗兩位男仕, 因此佢地有得揀, 我地已經assign咗間單人房俾佢地啦…哈哈!!
之後我地行巴扎, 想買啲糖/餅食, 又喺雞同鴨講之際, 又出現咗一個當地男人啦, 又負責做我地嘅翻譯, 仲帶我地隨處行同去咗Ehsan Guesthouse食dinner. 佢仲問我地點解唔住呢間酒店, 呢間平過我地住緊果間, 咁我唯有同佢講, 我sent過e-mail過嚟, 但佢冇覆呀, 佢猛咁同我say sorry, 我話都唔關你事, 唔使同我say sorry喎, 佢話佢都係伊朗人, 佢代表呢間酒店同我say sorry喎, 佢地嘅民族意識都幾好喎, 佢仲好認真咁問人地點解唔覆我e-mail, 果度個人又真係去check, 點知佢話覆咗我full咗, hm…….講真, 我”漁翁撒網”去book酒店, 真係miss咗都唔奇…hehe!!!可能我真係怪錯人啦…食完飯返酒店啦..
Manouchehri House web site:
http://www.manouchehrihouse.com/hotel.html
想睇多啲相, 可以到以下嘅FB:
https://www.facebook.com/media/set/?set=a.10152248053290647.932099.860415646&type=1&l=9daa3b0363
因為尋晚太夜瞓啦, 所以我地都變咗係最遲起身同食早餐果幾個. 食完早餐, 我地跟咗個岩岩識嘅湖南人去唱”黑市錢”, 因為黑市同喺銀行唱係爭成倍架, 其實酒店都係唱緊個黑市rate, 但係我地相信出面個rate應該好啲, 所以我地出咗去唱. 呢個湖南人都係踩單車旅遊嘅, 睇番佢個微博, 佢已經到咗格魯吉亞啦, 真係羨慕佢有咁嘅膽量/勇氣/體力去玩”踩車旅遊”.
行咗幾個字, 終於到咗一個好多人嘅地方, 我地問吓佢地個rate幾多, 初時果幾個果rate, 我地都覺得唔ok, 我地之後問果個ok la, 諗住同佢唱, 不過唔知點解有成班人圍住, 咁我地去番佢個檔口唱, 果條友仔逐啲遂啲俾錢我地, 又唔一次過, 又鬼死咁多錢, 等我地數完又數, 數咗九萬幾次, 連個湖南人都同我地講, 你地快啲攪掂佢啦, 你地好多錢呀. 咁我地攪掂晒, 果條友仔又問我地攞佣金喎, 咁你又唔早講, 頂!!擺明老屈啦, 我地同佢拗數, 佢死都話要收佣金喎, 坦白講, 唔係俾唔起呀, 係唔順氣嘛, 不過冇法, 我地為咗儘快離開現場, 我地唯有俾啦. 其實如果唔係今日係星期五, 佢地嘅休息日, 我相信可能去其他地方, 應該唔使收佣金, 今次擺明俾人老屈.
之後湖南人帶我地由第二條路返酒店, 沿路見到一個武器嘅展覽, 我地當然走咗去影相同玩啦, 我地見啲小朋友玩果架唔知乜嘅武器玩得鬼死咁投入, 好似玩氹氹轉咁, 真係唔通啲小朋友Born to be Soliders?!?!唉!!!其實我地都好想玩果架嘢, 不過等咗好耐都玩唔到, 真係好想同小朋友講, 俾我玩1分鐘啦, 我地玩完俾番你玩啦, 不過我地最終冇咁做囉, 因為明知佢地聽唔明我地講嘢….哈哈!!後來我地見到有架坦克車, 好想爬上去玩, 不過又驚佢地唔俾女人爬上去, 不過後來我地都唔理啦, 照爬上去玩同影相, Yeah!!
之後我地返番酒店, 分埋錢, 就商量行程啦, 因為我今次完全冇做功課, 完全跟團, 所以佢地話去邊, 我就去邊啦. 去第一站: 巴列維皇宮（Sa'd Abad Museum）係搭地鐵架, 估唔到我地嘅第一景點就係”男生圍”, 我地一去到月台, 就有好多人望住我地, 眼都唔眨, 我地已經喺度笑啦, 入到車卡, 簡直以為佢地係未見過女人咁, 望到你實一實, 我地成班女不段用”你嘅一點呀, 條仔好ok呀”, “嘩, 你嘅三點條佬唔多掂喎”. 不過我地又衰嘅, 真係好似喺香港搭地鐵咁, “儘量行入車廂中間”, 可能當地女人唔會咁, 同埋佢地真係會去Women Only嘅車廂, 所以佢地咪覺得奇怪囉….
去到個皇宮, 行幾個圈, 又咁岩有fair, 我地又玩咗一輛, 又應當地人要求咁影吓相 (我地叫呢啲做”加持”). 原本個景點只需1小時, 都會因為”加持”攪到成個半鐘先走得.
之後去咗一個清真寺, 因為星期五嘅關係, 好鬼多人, 我地分開男女入去清真寺, 而女就要喺門口披住張”床單”先入得去, 一入到去真係好鬼多人, 好似行維園花市咁, 啲人都好虔誠咁摸住個聖櫃嚟喊 (當然我地唔知佢喊乜啦!!). 我地出咗嚟之後要做好多”加持”, 啲亞爸亞媽又”恐”啲小朋友同我地影相, 又同我地傾偈, 攪到我地鬼死咁忙. 真係未試過咁受歡迎架…哈哈!! 之後食完dinner就去咗和平塔啦, 行一陣就返酒店啦, 成12:00先起程返酒店, 今日仲要冇食lunch, 我地呢團真勁!!!!
想睇多啲相, 可以到以下嘅FB:
https://www.facebook.com/media/set/?set=a.10152241357150647.931340.860415646&type=1&l=8d176be9a7
今日一早起身收到message, Jason話佢班機會delay, 成1:10先去到機場, 但係我地去Tehran班機2:30起飛喎, 好擔心佢趕唔切, 我地去到check in counter就問地勤班機會唔會delay, 佢地話唔會, 好準時咁2:30起飛, 咁再問如果真係miss咗呢班機, 咁可以點, 佢地話只可以搭後日班機, 吓, 咁好大獲喎, 我地乜都做唔到, 只好等Jason電話啦, 1:30佢打電話嚟話到咗, 等緊行李, 咁我地問佢邊個terminal落機, 原來佢係Terminal 2, 而我地就喺Terminal 3上機去Tehran, 咁就一定趕唔到啦…..真係好擔心., 我地唯有叫佢儘快, 所有要排隊嘅都同人講佢趕時間, 俾佢過先. 到咗呢個時候, 我地乜都做唔到, 只好入閘啦. 好彩個天都幫咗Jason, 因為北京周邊天雨關係, 班機仲未到北京, 所以要delay (車, 之前又話冇delay) , 點知delay咗5個小時, 攪到我地成十二點幾先到酒店, 好彩有車嚟接我地唧.
想睇多啲相, 可以到以下嘅FB:
因為悶悶地上TL睇睇有冇”團”出, 見到有個伊朗團, 時間ok, 行程ok, 就咁就join咗啦.
同好多人講話去伊朗, 佢地都話”打仗”喎!? 點解要去呀? 好好玩咩!?!?其實我去伊朗嘅主要原因係因為”伊朗”呢兩個字. 講真, 雖然身邊好多朋友都去過, 但始終佢唔係咁popular, 而且我對呢個地方一冇所知, 剩係知美國同佢唔妥, 好似好神秘咁, 咁就更加要去啦. 哈哈!!!
而聽好多朋友去過都話伊朗好正, 啲人超nice, 係一種unexpected嘅nice, 講真, 去咁多地方, nice嘅人遇唔少, unexpected嘅nice !?!!?真係想知點unexpected.
終於由台灣返嚟果幾日就即刻買機票, 好彩南航仲有$5500全包機票, 停北京, 仲可以玩埋北京, yeah!! 即買!!
買完機票, 就睇睇個行程去book酒店啦, 以我一向”漁翁撒網”方式去book酒店, 段估起碼都有幾間有房啩, 仲要我地去果陣唔係peak season, 應該冇問題. 頂!!!點知啲酒店成個week都唔覆e-mail, 就算覆咗有房啦, 我地confirm個reservation, 佢又唔回覆我地個reservation有冇問題喎. 攪到我要resend幾次e-mail, 到上機果日先 confirm到第一晚酒店, 去到北京先confirm有車嚟機場接我地去酒店, 究竟係佢地做嘢嘅速度太慢定係我地太心急呢!!!??
起行嘅日子到啦, 如常地去機場, 如常地到達北京, 咁我地去一早經ctrip book好嘅如家酒店啦, 因此我地班機遲咗少少, 我地唔可以6:00前到, 成7:00先到, 咁去到, 佢話ctrip cancel咗我地booking, 咁我問佢有冇房, 佢話冇, 我地再問佢附近有冇酒店, 佢話附近有間”漢庭”, 我地問佢出咗門口, 轉左定轉右, 佢竟然同我地講, 你見唔見到我隻手指指住邊度呀, 出面呀!! 妖, 我頂你, 我識路使問你, 你條PK記住呀, 我今日唔係你個客, 第日都可能係, 不過放心, 你”如家”咁嘅服務態度, 我以後都唔想住囉……咁我地出到去, 問人邊度有酒店, 佢地好細心話俾我地聽點行可以去到, 比起”如家”條PK真係好好多. 最終我地住咗”7天”, 果度個服務員真係好好多, 又有笑容. Settle咗, 又出去我唯一識果條街 – “簋街”食嘢啦, 是但咁去咗一間食dinner, 之後經過四合院設計嘅”花家怡院”, 我地只係睇睇個菜牌, 個waitress就叫我地入去參觀啦, 因為我之前嚟過呢度食飯, 果陣個經理仲好似tour guide咁介紹間餐廳俾我地. 所以我都如常地話俾我朋友聽間餐廳嘅嘢啦. 行行吓, 有個”實Q”嚟到, 今次到佢介紹間餐廳啦, 仲同佢傾咗成個鐘頭偈, 嘩!!傾到成十二點幾先走, 雖然我地明天係兩點幾機唧, 但係都要瞓架, 終於我地返到酒店, 沖好涼就瞓啦, 明天真係要起程去德黑蘭啦…..
想睇多啲相, 可以到以下嘅FB:
https://www.facebook.com/media/set/?set=a.10152237153610647.930740.860415646&type=1&l=ff7adb5cb7
