雖然天氣暖番些少，但原來有啲 "冇家者" 都唔係好夠衫著架。
今晚經過大角咀同油麻地，見到有啲執紙皮婆婆喺咁凍嘅天氣仲摺緊紙皮, 我落車俾件衫佢, 佢反問我, 點解唔自己著, 坦白講, 唔係好識答佢, 只好話: "我夠衫架啦, 你好似好凍呀, 著多件衫啦", 之後再喺大角咀兜幾轉, 再殺去油麻地, 沿路同"機師"睇下有冇啲有需要嘅人士. "機師"果然係出勤咗咁多次, 一眼關7, 一眼就話"你兩點方向有個", 真係勁呀.
因為之前打過電話俾吳氏伉儷, 知道駿發花園後面條tunnel可能唔夠衫, 所以我地去咗果度派, 講真, 我都係第一次行呢條tunnel (真係幾靜). 俾咗件褸"冇家者", 佢即刻著起, 仲同我講 "嘩,呢件褸好暖呀, 多謝晒!!" 講真, 如果佢係夠衫, 佢唔會一攞到件褸就即刻著囉...可想而知佢之前果幾日點過架. 我有啲"新金山"飯飛喺度, 俾咗張佢.
之後再去榕樹頭果邊啲紙皮屋, 原來果度個環境都好差, 我地真係唔知邊度可以搵到人, 後來有把聲同我地講 " 呢間冇人架....."不過我地只係見到有個人瞓緊覺咋喎...嘩!!你咪話唔驚, 原來把聲係塊板後面個人講架....(真係嚇死), 後來經佢講邊間"屋"乜人, 男定女, 我地終於喺呢個位散晒所有嘅冷衫, 洗頭水, 沐浴露啦....
之前我只係識喺深水埗同油麻地橋城散嘢, 其實香港好多地區都有"需要者"架, 只要我地"開咗眼"就睇到架啦....
今晚好多謝舊同事嘅兩袋冷衫，吳氏伉儷嘅報告, 仲有唔該機師嘅出動，車我去"放火".
多謝各位, 可能第日仲需要大家幫手去"放火"架, Thank you 先!!
 |
| 其實只係用咗呢間公司嘅膠袋唧, 不過為了避嫌, 都係"馬賽克"佢地個名先!! |
 |
| 咁薄嘅一張被, 真係睇見都凍呀.. |
 |
| 就係喺呢度見到兩個唔識嘅傻人!! 哈哈!! https://www.facebook.com/ |
 |
| 呢位叔叔一攞到我件褸就即刻著啦, 我諗佢之前真係好凍呀... |
 |
| 坦白講, 呢條Tunnel真係好靜呀!! |
 |
| 咁薄嘅一張被, 真係睇見都凍呀.. |
沒有留言:
張貼留言